Үздік бастапқы әскери дайындық мұғалімі сайысы

6 қаңтар күні Әлихан Бөкейхан Университеті Әскери кафедрасында ҚР Оқу ағарту министрлігінің бастамасымен "Білім беру және жаңа инновациялық технологиялар орталығы" білім беру мекемесінің ұйымдастыруымен "Үздік бастапқы әсери және технологиялық дайындық мұғалімі - ұйымдастырушы" республикалық сайысы өтті.

Сайысқа республикамыздың әр өңірінен келген жалпы білім беретін орта мектептер мен колледж ұстаздары қатысты. Атап айтқанда,   Абай, Түркістан, Қостанай, Павлодар, Қарағанды облыстарының педагогтері бақ сынасты.

Сайыстың мақсаты - бастапқы әскери дайындық мұғалімдерінің мәртебесін арттыру, оқушыларға әскери патриоттық тәрбие беру жұмысы бойынша тәжірибе алмасу, педагогтердің кәсіби біліктілігі мен шығармашылық белсенділігін арттыру, салауатты өмір салты мен әскери қолданбалы спорт түрлерін насихаттау.

Сайыс барысында қатысушылар БӘТД пәнінің оқу бағдарламасына сәйкес тест сұрақтарын шешу, автоматты жылдамдыққа жартылай бұзу және жинау, пневматикалық винтовкадан нысана көздеу, газдан қорғайтын тұмылдырықты жылдамдыққа киіп шешу, сонымен қатар турникке тартылу, қысқа дистанцияға жүгіру және гранатаны дәлдікпен лақтыру сынды сайыс түрлері бойынша бақ сынасты.

Сайыстар қорытындысы бойынша ең көп ұпай жинаған қатысушылар арнайы дипломдармен, медальдармен және бағалы сыйлықтармен марапатталды. Атап айтқанда, жүлделі орындарға и болған оқытушылар:
1 орынды Түркістан облысы, Кентау қаласының педагогі Камалов  Сургат және Қарағанда облысы, Бұхар жырау ауданының оқытушысы Шакенов Самал иеленді.

2 орын Павлодар қаласының мұғалімі Джамбусинов Аманжол мен Қостанай облысы, Ұзынкөл ауданынан келген мұғалім Лезбаев Сергейге бұйырды.

3 орынды Семей қаласының Қалматаев атыдағы медицина колледжінің оқытушысы Толеуов  Олжас пен ШҚО Зайсан ауданының педагогі Қалиев Мурат иеленді